Dili (timorpost.com) – Iha loron Segunda 24 Fulan Outubru 2022, estudante Finalista na’in-395, husi Eskola Sekundáriu Jerál Nicolau Lobato, sei tuir Ezame Nasionál.

Diretór Eskola Sekundáriu Jerál (ESJ) Nicolau Lobato, Marcos Soares Paeheco, hatete segunda agora tuir Ministeriu Edukasaun, Juventude no Desportu (MEJD), katak iha Territória tomak estudante Finalista sira hotu sei tuir Ezame Nasionál.

“Ami-nia eskola Sekundáriu Jerál Nicolau Lobato ne’e kompostu husi Departamentu Rua, hanesan Siénsia Teknólojia, Finalista feto no mane na’in-230 no Siénsia sosiais feto no mane na’in-165. Ida ne’e maka ami agora prepara hela no prontu ona, hein de’it segunda Ezame Nasionál “, nia hateten ba Timor Post online, iha knaar fatin Tasi-tolu.

Alende ne’e iha Segunda matéria ne’ebé Finalista sira atu Ezame ne’e maka matéria Siénsia Sosais nian maka Ekonomia ho Inglés, Siénsia Naturais Inglés ho Matemátika, enkuantu loron Tersa ba leten ne’e Komisaun maka hatene nia hatene de’it Segunda nian.

“Ha’u labele garante katak estudante Finalista sira iha ne’e atu liu hotu, maibé ida ne’e depende sira-nia esforsu no prepara sira-nia aan didi’ak no tenke estuda, Portantu hanesan Ministru Edukasaun, Juventude no Desportu, Armindo Maia dehan estudante Finalista sira hotu iha Territória tomak laliu iha Ezame Nasionál, karik labele fó sala ba Maromak no mós labele fó sala ba profesor sira hotu”, nia dehan.

Tanba ne’e nia husu estudante sira tenke prepara aan no estuda didi’ak hodi nune’e sira bele ultrapasa iha Ezame Nasionál iha tinan 2022 ne’e, karik sira la prepara ne’e pasiensia hela no la liu iha tinan ida ne’e, tinan oin maka tuir fali.

Jornalista : Ermelinda Caet
Editor : Mário da Costa

Fonte Notísia : https://timorpost.com/edukasaun/tp-27179/estudante-iha-eskola-nicolau-lobato-prontu-partisipa-ezame-nasional/